Corn Candy

Орц:

* 225-230 гр хөөсөн чихэр (miniature marshmallows)
* 1 стакан + тавцан дээр цацах нунтаг сахар
* 2 амны халбага ус
* шар, шаргал (эсвэл улаан) хүнсний будаг

Бэлтгэх нь:

1. Ус, хөөсөн чихэрээ халуунд тэсвэртэй том шилэн саванд хийгээд богино долгионы зууханд хийн өндөр дээр 1 минут жигнэнэ. Гаргаж ирээд хутгахад, хайлаагүй, том томоороо хөөсөн чихрүүд байвал дахиж 30-45 минут жигнэнэ.
2. Гаргаж ирээд модон эсвэл резин хутгуураар хутгаж хайлуулна. Сахараа бага багаар нэмж зунгааралдсан, хутгаж болохгүй болтол хутгаж нийцүүлнэ.
3. Ажиллах тавцан дээрээ нунтаг сахар цацаад зуурмагаа гаргаж ирнэ. Дотор нь бөөгнөрсөн сахрыг нийцтэл, хатуурч хэлбэрт орохуйц, илдэж болохуйц болтол нэмэгдэл сахар цацан нухна.
4. Бэлэн болсон зуурмагаа 3 тэнцүү хуваагаад нэгийг нь цааш нь тавина. Үлдсэн зуурмагны нэг дээр шар, нөгөө дээр шаргал будаг 4-5 дусаана. Шаргал будаг байхгүй бол бага зэрэг улаан, бага зэрэг шар будаг холиж шаргал өнгө гаргаж авна. Энэхүү чихрийг шар, шаргал, цагаан өнгөөр бэлтгэдэг уламжлалтай ч ногоон, цагаан, цэнхэр гээд хүссэн өнгөө хэрэглэж болно. Заавал 3 гэлтгүй 2 өнгөөр бэлтгэхэд гэмгүй.
5. Зуурмагийг тус тусад нь шар, шаргал болтол нь нухна.
6. Хангалттай том тавцантай бол дээгүүр нь нунтаг сахар тараан цацаад бэлдмэл бүрээ бууз, баншны гурил бэлтгэж буй мэт сувина. Тавцан тань жижиг бол зуурмаг бүрийг 2 хуваан нийт 6 хэсэг болгож байгаад сувиж болно. Хэр урт сувих нь хэр хэмжээтэй чихэр хийх гэж байгаагаас тань шалтгаална. Гэхдээ 0.8-1 см диаметртэй сувибал зохимжтой.
7. Сувих ажил дуусахад ойролцоо урттай, ойролцоо диаметртэй 3 эсвэл өнгө бүрээс 2 нийт 6 бэлдмэлтэй болно.
8. Сувисан бэлдмэлүүдээ зэрэгцүүлэн тавиад наалдахгүй байгаа бол нойтон багсны тусламжтайгаар наах талуудыг багахан чийглээд наана. Энэхүү үйлдлийн эцэст чихэрээ гурвалжилан хэрчиж эхлэнэ.
9. Хавтгай чихэр бэлтгэхийг хүсвэл нааж бэлтгэсэн 3 өнгөтэй туузаа зөөлөн дарж илдээд зүснэ.
10. Ингэж бэлтгэсэн чихэрээ тавцан дээр нь хэсэг байлгаж бага зэрэг хатаагаад сервислэнэ.