Сохор номингийн үүр бялуу (köstebek)

Tуркэд ийм нэртэй бялууны бэлдмэл зардаг бөгөөд би 2 ч удаа авч хийж байлаа. Сүүлд (энэ жил 2 сард, дүүгийхээ төрсөн өдрөөр) хийхдээ заавал бэлдмэл авалгүй өөрөө хийж болох юм байна гэж бодож байсан юм. Хэдийгээр туршиж үзээгүй ч бэлэн бэлдмэлээр хийснээс дутуугүй болно гэдэгт найдаж байна.


Oрц:

* Какакотой/шоколадтай кекс
* 150 мл цөцгий
* нунтаг сахар (өөрийн вкусанд тааруулан)
* 2-3 ш гадил жимс
* жижиглэж хэрчсэн шоколад (хүсвэл)

бэлтгэх нь:

1. Кексээ хэвэндээ тааруулан жорын дагуу хийж бэлтгэнэ.
2. Цөцгийн дээрээ бага багаар сахар нэмэн цахилгаан холигчоор хутгасаар өтгөрүүлнэ. Дээр нь хуваасан шоколадаа нэмээд халбагаар хутгаж нийцүүлнэ. Хөргөгчинд хийнэ.
3. Гадилаа арилгаад уртааш нь таллан хувааж бэлтгэнэ.
4. Бэлэн болсон кексээ дээрээс нь харж байгаад ирмэгээс нь 1 см хэртэй тойруулан зүснэ. Дараа нь зүссэн мөрөөрөө халбага оруулан кексний захыг гэмтээлгүйгээр доторх кексийг (ёроолд нь 2-3 см кекс үлдээх хэрэгтэй) ухаж авна.
5. Кекс ухаж аваад үлдсэн нүхэнд таллаж зүссэн гадилаа өрж тавиад хөргөгчинд хийсэн кремээ гаргаж ирэн дээр нь пөмбийлгөн овоолно.
6. Ухаж гаргаж ирсэн кексээ нунтаглаад кремэн дээгүүрээ асгана.